A Concellería de Benestar
Social do Concello de Marín, a través do CIM, iniciará novas actividades
despois do verán con dous cursos concedidos pola Deputación de Pontevedra, un
de PINTURA E RESTAURACIÓN DE MOBLES e outro de TAPICERÍA e unha ANDAINA, dende
a Finca de Briz ata o Cruceiro de Pazos, datado no ano 1816 e preto da Igrexa
de San Xulián.
Para participar na
Andaina só é necesario acudir puntualmente con roupa cómoda e algunha bebida
para hidratarse á Casa Principal da Finca de Briz ás 19.00 horas o día 16 de
setembro, pois será o punto de partida dende onde se iniciará a marcha. Esta
actividade ten como obxectivo o descubrimento de novas rutas e a revalorización
do noso patrimonio. Ás persoas que participen na marcha entregaráselles unha
ficha con información sobre o monumento a visitar que poderán coleccionar xunto
con outras que se darán en posteriores marchas que se levarán a cabo.
Esta concellería
espera que as actividades sexan de interese para a poboación e supoñan un punto
de encontro de xente interesada en facer exercicio e socializarse aproveitando
o noso patrimonio histórico e unha oportunidade de atopar unha alternativa de
formación de calidade e autoemprego cos cursos concedidos pola Deputación de
Pontevedra.
Para máis
información poden acudir ao Centro de Información ás Mulleres, sito no segundo
andar da Finca de Briz, ou chamando ao teléfono 986891802 en horario de 8.00 a
14.30 horas.
No hay comentarios:
Publicar un comentario